«Kommandøren» blir innstilt på ny. Ingen pendlaravgangar torsdag morgon

Det ser mørkt ut for dei som treng reisa med Våge-Halhjem-ferja mellom kl. 20.30 onsdag kveld og 11.30 torsdag. I denne perioden vert nemleg MF «Kommandøren» innstilt.

Det melde Fjord1 kl. 17.43 onsdag. Årsaka er oppgitt til å vera sjukdom.

Innstillinga betyr i praksis at siste avgang frå Våge onsdag er kl. 19.00, og siste frå Halhjem kl. 19.45. Første avgang frå Våge torsdag blir kl. 11.30, og første frå Halhjem kl. 12.15.

For dei mange pendlarane og for andre som treng å bruka ferja torsdag morgon er dette ein kjedeleg beskjed å få. Ein kan køyra rundt Fusa, men det er ikkje eit alternativ for alle. At det er vinterføre gjer ikkje saka betre.

Kanskje kan Rødne si skuleskyss-rute mellom Våge, Bruntveit og Osøyro vera redninga for nokon? Sjå rutetabell for hurtigbåten her. «Tysnes» har fått bekrefta frå ein tilsett i Rødne at det også vil vera mogleg å følgja båten frå Osøyro tilbake til Våge klokka 08.00, når den eigentleg er ferdig med ruta si for morgonen.

Me minner elles om at Hardangerfjordekspressen (frå Malkenes) er ei moglegheit. Sjå ruteinfo her.

Også på dagtid onsdag var ferja innstilt, men då på grunn av eit teknisk problem.