Låg arbeidsløyse i Sunnhordland gjennom sommaren

Arbeidsløysa i Sunnhordland var 1,0 prosent i juni og 1,1 prosent i juli, ifølgje ei ny pressemelding frå NAV Sunnhordland. Det tilsvarte 324 heilt arbeidsledige i juni og 349 i juli.

På landsbasis er arbeidsløysa på 1,9 prosent, og i Vestland 1,6 prosent, både i juni og juli.

Som forventa 

I juni hadde Stord og Tysnes den lågaste arbeidsløysa i regionen med 0,8 prosent. Vidare følgde Sveio og Fitjar med 1,0 prosent, Kvinnherad med 1,1 prosent, og Etne og Bømlo hadde den høgaste arbeidsløysa, med 1,4 prosent.

I juli hadde Stord framleis den lågaste arbeidsløysa med 0,9 prosent, følgd av Kvinnherad med 1,0 prosent. Sveio og Tysnes låg begge på 1,1 prosent, medan Fitjar hadde 1,2 prosent og Bømlo 1,4 prosent.

Regionleiar Håvard Lægreid i NAV Sunnhordland seier den låge arbeidsløysa er som venta, men at det denne sommaren ikkje har vore den vanlege nedgangen fordi lediggangen har lege lågt gjennom heile året.

Talet på utlyste stillingar gjekk ned frå 370 i juni til 210 i juli. Behovet for arbeidskraft er framleis størst innan helse, pleie og omsorg, medan barne- og ungdomsarbeid er yrkesgruppa med størst vekst samanlikna med same tid i fjor.

Ventar ein auke utover hausten

Sjølv om arbeidsmarknaden framleis er sterk, ventar NAV at arbeidsløysa i regionen vil stiga utover hausten og vidare inn i 2027.

– Dette er i tråd med det prognosane om arbeidsmarknaden i Sunnhordland seier, og heng i stor grad saman med aktiviteten i verftsindustrien i regionen, seier Lægreid.