Frå 1. august auka fritaket for eigendelar i helsetenesta frå 16 til 18 år. Det betyr at også 16- og 17-åringar kan gå til legen utan å måtta betala eigendel, opplyser Helse- og omsorgsdepartementet i ei pressemelding.
Fritaket gjeld for legehjelp, psykologhjelp, poliklinikk, legemiddel, pasientreiser, fysioterapi, enkelte former for tannbehandling, opphald på opptreningsinstitusjonar og behandlingsreiser til utlandet.
Annonse
– Alle skal vera trygge på at dei har tilgang på gode og forsvarlege helsetenester, når dei treng det. Me må unngå at 16- og 17-åringar lar vera å oppsøkja legen på grunn av økonomi. Difor fjernar me no eigendelen for å skapa tryggleik for helsa, seier helse- og omsorgsminister Jan Christian Vestre.
Samtidig føreslår regjeringa å justera opp eigendelstaket med 128 kroner, til totalt 3.406 kroner i 2026. Eigendelen i spesialisthelsetenesta aukar med 40 kroner. Det betyr også ein auke i ikkje møtt-gebyret, heiter det i pressemeldinga.
