Nye smittetilfelle - anbefalar utsetting av arrangement og aktivitetar
Smittetalet i kommune aukar. Totalt er det 15 tysnesingar som har fått påvist smitte denne veka.
Det er no påvist 15 smittetilfelle i Tysnes kommune, det meldar kommunen sjølv på eigne nettsider laurdag. Tidlegare denne veka blei det meld om fem smittetilfelle i kommunen, og mange har testa seg dei siste dagane. Resultata av desse testane har no gjeve ti nye påviste tilfelle.
Dei fleste av smittetilfella har tilknyting til 3. klasse ved Uggdal skule eller 5. klasse ved Tysnes skule.
Artikkelen held fram under annonsen.
Laurdag var det møte i kommunal kriseleiing (KKL), der kommuneleiinga gjekk gjennom situasjonen og vurderte moglege tiltak.
– No anbefalar me at alle arrangement, idretts- og korpsaktivitetar og andre samlingar i den komande veka blir utsett, fortel ordførar Kåre Martin Kleppe til «Tysnes».
I tillegg blir det innført gult beredskapsnivå i skulane og barnehagane frå og med måndag. Kommunen kjem og med generelle oppmodingar om at ein held seg heime og testar seg viss ein har luftvegsinfeksjon, held avstand til andre i offentlege rom og avgrensar talet på nærkontaktar.
For å avgrensa smittespreiinga ved Uggdal og Tysnes skule blir alle elevar tilbydd hurtigtestarar til heimetesting, og ynsket frå kommunen er at alle testar seg før dei møter på skulen måndag morgon. Meir informasjon om heimetestinga vil bli gjeve i Visma, informasjonssystemet for skuleelevar og føresette.
