Omdisponerer 650.000 kroner til trafikktrygging

Hovudutvalet for samferdsel og mobilitet omdisponerte 650.000 kroner i trafikktryggingsbudsjettet på møtet 16. september. Pengane skal gå til MC-tryggleik og arbeid for auka refleksbruk.

Bakgrunnen for omdisponeringa er at det kom inn færre søknader enn venta til tilskotsordninga «Tilskot til kommunale trafikktryggingsplanar». Arbeidet med å få fleire til å bruka refleks får difor 200.000 kroner, og rekkverksarbeidet i Vestland får 450.000 kroner. 

– Motorsyklistane er blant dei mest sårbare trafikantane våre, og statistikken syner at me må gjera meir for å hindra alvorlege utforkøyringsulukker, seier Arve Helle, leiar i utvalet. 

Ifølgje Helle gjer omdisponeringa det mogleg å setja i gang eit meir målretta rekkverksarbeid på strekningar der risikoen for ulukker er størst. Vestland fylkeskommune har i dag eit etterslep på vedlikehald og oppsetting av nye rekkverk. Underskinner på stålrekkverk og gjerde over betongrekkverk er tiltak som kan redusera skadegraden i ulukker der motorsyklistar køyrer inn i rekkverket.

Talet på fotgjengarar som bruker refleks, har auka i Vestland fylke, men minka nasjonalt. I 2023 brukte 41 prosent av fotgjengarane refleks. I 2024 var delen auka til 48 prosent.

– Det er svært gledeleg at fleire i Vestland har teke refleksbruken på alvor, i ei tid der den nasjonale trenden faktisk peikar feil veg, seier Helle.