Ønskjer minst mogleg besøk på sjukehusa

Stadig fleire blir smitta av koronaviruset, og talet på pasientar på sjukehusa aukar. Helse Fonna ber no publikum om å unngå besøk som ikkje er nødvendig.

Det har dei siste to vekene vore ein stor auke i talet på smitta personar i Helse Fonna-regionen, noko som også merkast på sjukehusa. No er det fire innlagde pasientar med Covid-19 på Haugesund sjukehus, og det blir planlagt for å kunna ta imot fleire framover. Beredskapsleiinga i Helse Fonna vurderer tiltak fortløpande.

– Me aukar ikkje beredskapsnivået no, men me følgjer situasjonen nøye, og gjer vurderingar frå dag til dag. Me har også tett dialog med kommunane, opplyser administrerande direktør Olav Klausen i Helse Fonna, i ei pressemelding onsdag.

Vurderer fleire tiltak

Aktiviteten går førebels som planlagt. Direktøren ber publikum om å vurdera i kva grad det er nødvendig å komma på besøk, særleg til pasientar som ikkje er alvorleg sjuke, eller som ligg inne i kort tid.

– Me oppmodar om at berre dei mest sårbare pasientane tar imot besøk, eller har med seg følgjeperson. Då tenkjer me primært på kritisk sjuke eller døyande pasientar, pasientar under 18 år, fødande, eller pasientar som av ein eller annan grunn treng følgje for å kunna få helsehjelp, seier Klausen.

Han ber om forståing for at sjukehusa i denne situasjonen ønskjer færrast mogeleg innanfor dørene.

Det blir også vurdert andre tiltak, som å flytta personell mellom avdelingar. Blir talet på pasientar med Covid-19 for høgt, må ein vurdera å gjenopna kohortavdeling, eige koronamottak, strenge besøksrestriksjonar og å redusera planlagt aktivitet.

Ber folk ta ansvar

– Me håpar sjølvsagt å unngå å redusera aktiviteten, fordi me framleis jobbar med å ta att etterslepet frå koronaperioden i fjor og fram til sommaren i år, seier Klausen.

Han har også ei tydeleg oppmoding til innbyggjarane i regionen:

– Me har hatt ein periode med lite smitte, og då slappar folk naturleg nok av. No aukar smitten, og eg vil oppmoda om å ta handhygiene på alvor, bli heime om ein er sjuk og å testa seg, seier Olav Klausen i pressemeldinga.