Siste førebuingar før festivalstart

Flyttinga av såtekonserten gav festival-leiinga litt ekstra høg puls, men Øystein Vaage føler at dei har god kontroll før Tysnesfest-isj brakar laus.

– Eg føler me har kontroll, men det blei litt ekstra hektisk på grunn av flyttinga av såtekonserten, fortel Øystein Vaage, dagleg leiar for Tysnesfest.

Sakte men sikkert har den nye minifestivalarenaen i hamna i Våge reist seg denne veka, og no er alt klart til å fyra i gang Tysnesfest-isj og konsertane på E-brygga.

– Ein kjenner det litt på nervane, seier festivalsjefen.

Flytta såtekonserten

Onsdag kveld er det duka for fyrste punkt på programmet. Det som eigentleg skulle ha vore ein soloppgangskonsert med artisten Ruben på Tysnesåto natt til torsdag, blei i staden til ein solnedgangskonsert på Solstråleøya. Konserten blei flytta på grunn av fare for mykje vind, samt lyn- og torevêr.

– Det var meldt ganske mykje vind, og 60 prosent sjanse for lynnedslag. Då var det naturleg å flytta konserten, seier Vaage.

Krigsråd

Han fortel at det var nokre hektiske timar hos festival-leiinga då dei tysdag bestemte seg for å flytta konserten.

– Då var det fullt krigsråd. Klokka 12 på tysdag bestemte me oss internt for å avlysa på Tysnessåto, og då hadde me ingen ny plan på plass.

Hektisk planlegging gjorde at dei klokka 15.30 kunne presentera flyttinga for publikum. Då var det bestemt at Solstråleøya blei den nye lokasjonen, og båttransport var bestilt.

– Eg lar meg imponera over dei som heiv seg rundt, spesielt Sigvard (Madsen, styreleiar for festivalen, journ.merk.) som fekk avtalt skyssing med hurtigbåt og MS «Midthordland» på eit par timar, seier Vaage, som forklarar at dei kunne ha valt ei enklare løysing enn Solstråleøya, men at dei ynskte å gjera noko litt meir spektakulært.

– Det er vanskeleg med logistikken der ute, seier han.

Det blir tilbydd båttransport både til og frå konserten, samt torsdag morgon for dei som ynskjer å overnatta i telt på øya. Vaage fortel at dei berre har fått positive tilbakemeldingar etter konsertflyttinga.

– Me har sikkert fått eit 20-tals positive e-postar. Det er ingen som har vore negative.

E-brygga

Sjølve hovudprogrammet under Tysnesfest-isj, som er kveldskonsertane på E-brygga, startar opp torsdag kveld. Då skal Bjørn Eidsvåg fyrst entra scena, før Stavangerkameratene avsluttar kvelden. Konsertscena er like stor som på arenaen på Gjerstad, og står på steinkaien vend ut mot E-brygga. På E-brygga blir det publikumsområde med plass til 200.

– Me kunne ha sett ei enkel scene i hjørnet, men me har ynskt å gjera ting på same måten som me pleier på Gjerstad. Det gjeld òg når det kjem til vakthald og den slags, fortel Vaage.

Dei gjeldande smittevernreglane gjer at det verken er behov for faste, tilviste plassar på publikumsområdet, eller at publikum blir sitjande i ro under heile kvelden. Derimot skjer all servering, både av mat og drikke, ved borda.

– Ein bestiller ved å nytta QR-kodene på bordet, seier Vaage.

– Og så er reglane slik at det er lov å gå fritt rundt, men ikkje med mat eller drikke i hendene. All eting og drikking må skje ved borda.

Trubadur

Vaage opplyser at dørene for publikum opnar 17.30, og at siste konsert er ferdig kring 22.00. Både før fyrste artist og mellom artistane kan det gå litt tid til å rigga om, men Vaage fortel at dei har planen klar.

– Me har trubadur som skal spela nede på E-brygga før fyrste artist og mellom artistane. Torsdag og fredag er det Jim Jacobsen, og laurdag er det Kjell Undheim, som er vokalist i Ingenting, fortel Vaage.

Han forklarar at dei med billett kan koma og gå som dei vil, men at han håpar flest mogleg blir verande i publikumsområdet.

– Det skal bli god stemning heile kvelden, seier han.

Marknadsdag

I tillegg til det lanserte programmet, som består av kveldskonsertane, dødsing frå MS «Sunnhordland», Ramnanuten opp og Blues-cruise, blir det òg lagt opp til marknadsdag på parkeringsplassen på kaien laurdag. Der blir det eit utval med lokale utstillarar, samt moglegheit for tur både med hest og helikopter.

– Der treng ein ikkje noko billett, men me skal passa på at det ikkje er for mange samla på ein gong. Då kan det henda ein må venta litt til det blir betre plass. Det blir lagt opp til parkering ved Windsor for dei som vil innom marknadsdagen, seier Vaage, som no gler seg til å koma i gang med programmet, spesielt med tanke på at det er to år sidan sist.

– Det er veldig rart kor godt det er å sjå området no med telt, benkar, scene pizzabakarvogn og alt det andre, avsluttar han.