Sommarjobbar kan bli viktig i kampen om arbeidskrafta
Publisert
Sist oppdatert
Ved utgangen av juni var 5.485 personar registrerte som heilt arbeidsledige i Vestland, ifølgje NAV. Det svarar til 1,6 prosent av arbeidsstyrken. Landsgjennomsnittet var på 1,9 prosent. Det kjem fram i ei pressemelding frå NAV Vestland.
Samstundes melder NAV om fleire ledige stillingar enn jobbsøkjarar i fylket. Den årlege bedriftsundersøkinga viser at verksemder i Vestland manglar over 6.000 tilsette. Helse- og omsorgssektoren hadde flest ledige stillingar i juni, med 1.304 utlysingar. Innan bygg og anlegg var det 730 ledige stillingar.
Annonse
NAV Vestland peikar på sommarjobbar som eitt tiltak for å knyta unge tettare til arbeidslivet i fylket. Så langt i år har det vore lyst ut om lag 5.000 sommarjobbar i Vestland. Ei kartlegging frå Vestland fylkeskommune viser at 33 kommunar til saman har registrert 754 sommarjobbar for ungdom under 18 år.
Fylkesdirektør Bjarte Hysing-Olsen i NAV Vestland meiner slike jobbar kan gjera det meir sannsynleg at unge blir verande og seinare bidreg med kompetanse i fylket.
