Telenor kjøper Enivest for 2,5 milliardar kroner

Førre månad skreiv «Tysnes» om salet av fiberselskapet Enivest. Då var Eviny, som var ein av eigarane som selde seg ut av Enivest, sparsame med detaljar om kven kjøparen var, då dei var midt i salsprosessen. No er det klart at det er Telenor som kjøper aksjane til Eviny og Sogn og Fjordane Energi (SFE) i Enivest, i ein avtale verdsett til 2,5 milliardar kroner. Det opplyser Telenor i ei pressemelding.

Les også:

Uvisst kva konsekvensar eit Enivest-sal får

Oppkjøpet omfattar Enivest sitt fibernett og om lag 28.000 kundar på Vestlandet, i tillegg til ein eigardel på 34 prosent i Årdalsnett.

Enivest har hovudkontor i Førde og kontor mellom anna i Sogndal, Florø, Stryn og Sunnhordland. Selskapet har om lag 50 tilsette og er ein av dei større regionale aktørane innan fiberkommunikasjon på Vestlandet.

Telenor opplyser at Enivest skal halda fram som eige selskap med same leiing som i dag. Telenor Norge har kring 3.300 medarbeidarar fordelt på rundt 20 kontor i Noreg, og er del av Telenor Group, med hovudkontor på Fornebu i Bærum.

Enivest hadde i 2025 inntekter på om lag 290 millionar kroner og eit driftsresultat før av- og nedskrivingar på rundt 130 millionar kroner.

Før handelen kan bli gjennomført, må han bli godkjent av Konkurransetilsynet.