Fire SV-lokallag reagerer på forslag om å fjerne TAF-tilbod
Du les no ei meiningsytring. Den uttrykkjer skribenten si meining.
Lokallaga i Bjørnafjorden, Kvam, Kvinnherad og Tysnes SV vurderer TAF/YSK som særs viktig ut frå eit distriktspolitisk omsyn.
TAF gjev solid utdanning og kompetanse til lokal ungdom som direkte, eller etter fullført høgare utdanning, kjem tilbake til lokale bedrifter og fyller viktige posisjonar i desse. Det sikrar gode arbeidsplassar og stabil arbeidskraft i bygdene.
Annonse
For ungdomane er det også viktig å ha eit kvalitativt godt tilbod lokalt som gjev trygge og interessante jobbar. Skulen erfarer at TAF/YSK-elevar er svært motiverte, har høgt læringsutbytte og lite fråfall. Ikkje all ungdom skal måtta ut av bygdene og til byar/sentrale strok for å kvalifisera seg.
Største bedrifta i Bjørnafjorden, Framo Fusa AS, har vore initiativtakar og medspelar i TAF-mekanisk, og skulen har samarbeidd godt med denne og andre bedrifter i bransjen.
Særs uheldig er det at TAF-marin er føreslått forsvinna heilt. Det er ei viktig utdanning som gjev akvanæringa tilgang til kompetente og breitt skulerte ungdommar, som kan ta næringa vidare vurdert frå eit miljøperspektiv.
TAF-helse er med og sikrar rekruttering til omsorgssektoren i området. For Fusa sin del utgjer dei 3 tilboda årleg kun 1,5 klasse, fordi skulen har god erfaring med å kombinera desse klassane i fellesfaga, også saman med dei ordinære yrkesfagklassane i programfaga.
Annonse
Å fjerna desse tilboda ved Fusa vidaregåande skule vil både svekka skulen og næringslivet i våre område. Solide utdanningstilbod lokalt er viktig mottrekk til sentraliseringskreftene.
