«Køntri» i Tysneshallen laurdag 3. oktober

No sit eg enno oppe, klokka er passert midnatt, og eg får ikkje heilt ro i mi musikalske sjel.

Kl. 23.00 forlét eg Tysneshallen, for å finna ro til å nyta dei musikalske opplevingane eg hadde fått med meg frå konserten. Det er sjølvsagt smak og behag i den musikalske verda. Dette showet var «indrefilet» etter min smak. Det var ei musikalsk oppleving, med samspel, flott repertoar og eit lydnivå som fekk fram det vokale på ein framifrå måte.

Eit slikt arrangement krev eit enormt forarbeid. Ikkje berre skal det øvast på låtar og setjast saman eit program som passar til vokalistane sine stemmer, for det er det me publikummarar får oppleva. Nei, med så mange aktørar på scena, blir dette eit lagarbeid som krev pasningskvalitet på høgt nivå. Her var det ikkje mange feilpasningar. Så kan eg sjølvsagt nemna alle timane som har vore brukte i «kulissane». Dei er ikkje få, men utruleg viktig for heilskapen i arrangementet.

I Bergen går det heile året revyar og show på ulike arenaer. Desse går kanskje over fleire veker, ja, månader. Dei som har øvt og øvt på eit kunstnarisk innhald, får framføra dette mange gonger. Slik er ikkje kvardagen for Tysnes musikklag sitt oppsett. Berre ein gong. Det skulle sjølvsagt vore vist mange gonger. Innhaldet var så godt at det overgår mange av dei oppsetjingane eg har opplevd. Desse frå større scener og profesjonelle aktørar frå «A til Å». Tysnes musikklag sitt bidrag, både musikalsk og arrangementsmessig, låg på eit høgt nivå. Takk for ein flott kveld!