Alex Lunde blir ny regiondirektør i Norconsult

Etter ein prosess med mange gode søknadar, frå både interne og eksterne kandidatar, er det no klart at Alex Lunde får jobben som direktør for region vest i Norconsult. Han er eit kjent fjes for mange tysnesingar ettersom han har slektsrøter her, og ofte legg turen til Tysnes når han har fri.

Alex Lunde tek over direktørjobben etter Jens Kvarekvål, som skal fortsetja med andre spennande oppgåver i Norconsult – den største rådgjevarbedrifta i Norge.

– Me er svært nøgde med at Alex har takka ja til stillinga, og har stor tru på at han med si erfaring og kompetanse vil bidra til vidare vekst og utvikling for regionen spesielt og Norconsult generelt, seier konserndirektør regioner Norge, Janicke Garmann, i ei pressemelding.

Alex Lunde har allereie lang fartstid i den innovative verksemda. Han kjem nemleg frå stillinga som leiar ved bergenskontoret til Norconsult, eit kontor med om lag 200 tilsette. Han har jobba i selskapet i 18 år, og er utdanna sivilingeniør frå NTNU.

– Eg er glad og audmjuk for å få denne moglegheita, og ser fram til å starta arbeidet med å utvikla regionen vidare. Det er mange spennande og store moglegheiter i åra som kjem, seier han.

Som regiondirektør vil han ha ansvar for Norconsult sine 11 kontor i vest.

redaksjonen@tysnesbladet.no