SLIT ALLEREIE: NAF har anslått forfallet på fylkesvegane til å kosta meir enn 108 milliardar kroner, og meiner at pengebruken på fylkesvegane må auka betydeleg for å få dei tryggare og betre.

Ekstramilliarden til fylkesvegane blir ikkje vidareført

Sara Haizoune Journalist
Publisert

NAF reagerer på at regjeringa ikkje vil vidareføra den ekstra milliarden til fylkesvegane som kom i revidert nasjonalbudsjett for 2026.

Etter forliket om revidert nasjonalbudsjett for 2026 blei fylkeskommunane tildelt éin milliard kroner ekstra til fylkesvegane. Løyvinga er ikkje vidareført i regjeringa sitt forslag til statsbudsjett for 2027, noko som får NAF til å reagera.

Organisasjonen meiner dette i praksis gir fylka éin milliard kroner mindre å rutta med til fylkesvegar neste år. Ifølgje NAF er vedlikehaldsetterslepet på fylkesvegane nasjonalt anslått til meir enn 108 milliardar kroner.

– Forslaget om å ta vekk desse pengane kan slå hardt ut for fylke som slit med høge kostnader og eit enormt forfall på vegane, seier pressesjef Ingunn Handagard i NAF.

Heller ikkje løyvingane til riksvegane aukar i regjeringa sitt forslag til statsbudsjett for 2027. Midlane til investeringar, drift og vedlikehald blir ifølgje NAF vidareførte om lag på dagens nivå, justert for venta prisvekst.

NAF meiner det må brukast meir pengar på vedlikehald, og viser mellom anna til at risikoen for alvorlege ulukker skal vera om lag dobbelt så høg på fylkesvegane som på riksvegane.

notisar nyhende notis
Powered by Labrador CMS