Kven skal me heidra med juleblom i år?
Sidan 2017 har Bladet Tysnes delt ut over 70 juleblomar til eldsjeler i lokalsamfunnet vårt.
Det byrjar å bli eit imponerande tal, men me har ikkje lyst til å stoppa der. Det er garantert fleire gode kandidatar som hadde fortent å bli løfta fram i spaltene våre.
No treng me berre litt hjelp frå dykk lesarar: Kven skal få juleblom denne gongen? Kven meiner du bidreg til å gjera kvardagen litt betre for menneska rundt seg? Det kan vera alt frå den hjelpsame naboen til han eller ho som alltid legg ned ein ekstra innsats når bygdelaget skal arrangera noko. Ein humørspreiar, ein pådrivar, ein ekstra god ven.
Kanskje har det allereie dukka opp eit namn eller to i hovudet ditt medan du las dette. Då håper me du vil tipsa oss i redaksjonen, slik at me kan vurdera å gi litt ekstra merksemd og velfortent heider til nettopp din kandidat.
Send oss ein e-post til redaksjonen@tysnesbladet.no, ring oss på 53 43 22 20, eller ta kontakt via Facebook eller Instagram.
Hugs å grunngje kvifor du meiner akkurat denne personen fortener ein juleblom. Me treng litt meir enn berre eit namn.