No er førsteinntaket for vidaregåande skule i Vestland klart. Det er over 23.000 søkjarar som har søkt om skuleplass til hausten, og 78 prosent har fått tilbod om førsteønsket sitt. Vestland fylkeskommune opplyser at 95 prosent av søkjarane har fått tilbod om eitt av ønska sine, medan fem prosent står utan tilbod etter det første inntaket.
Direktør for opplæring og kompetanse i Vestland fylkeskommune, Bjørn Lyngedal, fortel at fylkeskommunen jobbar målretta for at flest mogleg skal få eit tilbod før skulestart.
Annonse
Yrkesfag står framleis sterkt i Vestland, og i år hadde 60,5 prosent av søkjarane yrkesfag som førsteønske. Teknologi- og industrifag er det mest populære yrkesfaget på Vg1. På Vg2 er det mest konkurranse om desse programfaga:
Ambulanse (56,3 karakterpoeng)
Brønnteknikk (52,5 karakterpoeng)
Kjemiprosess- og laboratoriefag (52,5 karakterpoeng)
– At så mange vel yrkesfag er ei svært positiv utvikling. Vestland treng fleire fagarbeidarar, og me ønskjer å løfta statusen til yrkesfaga endå meir, seier Lyngedal.
Om lag 87,5 prosent av søkjarane til studieførebuande har fått tilbod om skuleplass. Dei mest populære skulane med studieførebuande program er:
Annonse
Amalie Skram (50,6 karakterpoeng)
Langhaugen (49,1 karakterpoeng)
Bergen Katedralskole (47,5 karakterpoeng)
