Tysnesingar som skal til fjells i helga, eller som kanskje skal heim frå fjellet etter haustferien, bør vera budde på snø og vanskelege køyreforhold.
Meteorologisk institutt har sendt ut gult farevarsel for snø i delar av fjellet i Sør-Noreg. Varselet gjeld frå fredag 9. oktober klokka 19 til natt til søndag 11. oktober.
Annonse
Det er venta mellom 5 og 15 centimeter snø i høgareliggjande område. Snøgrensa er venta å liggja mellom 900 og 1.100 meter over havet, men kan søkka til kring 500 meter på Austlandet. I vest minkar faren laurdag føremiddag.
NAF åtvarar mot å køyra til fjells med sommardekk når det er meldt snø, og oppmodar bilistane om å leggja om til vinterdekk før turen.
Piggdekk er tillatne før den ordinære vintersesongen dersom føret krev det, men dei må av igjen når ein kjem ned igjen i låglandet der det ikkje er vinterføre. På våre trakter er piggdekk tillate å køyra med frå 1. november.
