Regjeringa føreslår å auka produksjonstilskotet med 30 millionar kroner i statsbudsjettet for 2027. Auken skal særleg koma lokale medium til gode og bidra til å styrkja mediemangfaldet.
– Me i Landslaget for lokalaviser (LLA) er glade for at lokalavisene blir prioriterte og at regjeringa ønskjer å betra rammevilkåra til avisene som er grunnfjellet i mediemangfaldet i landet, seier generalsekretær Tomas Bruvik i LLA.
Annonse
I tillegg vil regjeringa auka innovasjons- og utviklingstilskotet med 10 millionar kroner. Midlane skal mellom anna gå til prosjekt som kan bidra til at fleire unge bruker redaktørstyrte medium.
LLA trekkjer også fram at regjeringa vil halda fram med støtte til Samarbeidsdesken, som gir lokalaviser tilgang til research og datapakkar for undersøkjande journalistikk.
Regjeringa vil dessutan halda fram ordninga som skal sikra distribusjon av papiraviser i område der det ikkje finst kommersielle avisbodnett.
LLA er samstundes kritisk til at regjeringa ikkje har funne ei løysing for plattformnøytralt momsfritak på journalistikk.
